HOME LAKSHMAN SRUTHI ORCHESTRA MUSIC SHOP MUSIC SCHOOL REHEARSAL HALL SERVICES RENTALS EVENT MANAGEMENT CHENNAIYIL THIRUVAIYARU
Quick Links     News & Events  | Music Review  |  Photo gallery  |  Videos |  Audios | Top 10 Songs  |   New Releases | Lyrics  |  Fun in Music | Tamil Books | Specials |
PROFILES     Music  |  Cinema  |  Dance  |  Drama  | TV  |  Radio  | Variety  |  Mimicrys  | Kavidhai  |  Partners  |  Upcoming Events  |  Logos  |  Contact us  |

தேசீய கீதங்கள்

6. பிறநாடுகள்
53.கரும்புத் தோட்டத்திலே

ஹரிகாம்போதி ஜன்யம்
ராகம்-ஸைந்தவி தாளம்-திஸ்ர சாப்பு
பல்லவி
கரும்புத் தோட்டத்திலே-ஆ!
கரும்புத் தோட்டத்திலே
சரணங்கள்

கரும்புத் தோட்டத்திலே-அவர்
     கால்களும் கைகளும் சோர்ந்து விழும்படி
வருந்து கின்றனரே!-ஹிந்து
     மாதர்தம் நெஞ்சு கொதித்துக் கொதித்துமெய்
சுருங்கு கின்றனரே!-அவர்
      துன்பத்தை நீக்க வழியில்லையோ?ஒரு
மருந்திதற் கிலையோ!-செக்கு
      மாடுகள் போலுழைத் தேங்குகின்றார், அந்தக்
(கரும்புத் தோட்டத்திலே) 1

பெண்ணென்று சொல்லிடிலோ-ஒரு
      பேயும் இரங்கும் என்பார்; தெய்வமே!நினது
எண்ணம் இரங்காதோ?-அந்த
      ஏழைகள் அங்கு சொரியும் கண்ணீர்வெறும்
மண்ணிற் கலந்திடுமோ?-தெற்கு
      மாகட லுக்கு நடுவினிலே,அங்கோர்
கண்ணற்ற தீவினிலே-தனிக்
      காட்டினிற் பெண்கள் புழுங்குகின்றார்-அந்தக்
(கரும்புத் தோட்டத்திலே)2

நாட்டை நினைப்பாரோ?-எந்த
      நாளினிப் போயதைக் காண்பதென்றே அன்னை
வீட்டை நினைப்பாரோ?-அவர்
      விம்மி விம்மி விம்மி விம்மியழுங் குரல்
கேட்டிருப்பாய் காற்றே!-துன்பக்
      கேணியிலே எங்கள் பெண்க ளழுதசொல்
மீட்டும் உரையாயோ?-அவர்
      விம்மி யழவுந் திறங்கெட்டுப் போயினர்
(கரும்புத் தோட்டத்திலே) 3

நெஞ்சங் குமுறுகிறார்-கற்பு
      நீங்கிடச் செய்யுங் கொடுமையிலே அந்தப்
பஞ்சை மகளிரெல்லாம்-துன்பப்
      பட்டு மடிந்து மடிந்து மடிந்தொரு
தஞ்சமு மில்லாதே-அவர்
      சாகும் வழக்கத்தை இந்தக் கணத்தினில்
மிஞ்ச விடலாமோ!ஹே!
      வீர கராளி,சாமுண்டி,காளீ!
(கரும்புத் தோட்டத்திலே) 4
<< Previous Index >> Next